Halil Xani : Vargje satirike

Halil Xani

 

DIALOG

(Me deputetin)

Unë: Mirëmbrëma, deputet!

Ai: Mirëmbrëma, o poet!

Ai: Si duket, do të na zërë agimi.

Unë: Pres të më vijë frymëzimi.

Ai: Sonte gjumë nuk kam as vetë.

Unë: Mos ke fjetur në Parlament?

Ai: Eh, ç’jeni ju shkrimtarët…

Unë: Thua të fortë i kemi darët?

Ai: Jo veç darët, po edhe grepat.

Unë: Thua po ua gjurmojmë xhepat?

Ai: Ne kemi shumë punë, vërtet.

Unë: Të merrni pagën e trembëdhjetë?

Ai: Për popullin nuk na zë gjumi.

Unë: Prandaj edhe na mori lumi…

EPIGRAME

Shit tokë në fshat,

banesë në qytet,

të bëhet djali deputet,

se shumë shpejt i kompenson

dhe shumëfish i tejkalon.

Në politikë duhet kujdes:

mos vidh pak, por me thes,

se po more pak, të fajësojnë,

për korrupsion të akuzojnë,

besa-besë edhe të dënojnë.

E le partinë tënde,

te ne erdhe vetë,

hajde, mirë se erdhe,

ne të bëjmë deputet!