Xhuli Spahiu : FËMIJËT E MI,ATDHEU IM...

Xhuli Spahiu

FËMIJËT E MI,ATDHEU IM...

Diku në Europë 

Francë,  Zvicër e në Gjermani, 

jetojnë copëza të zemrës sime, 

si drita që ndriçojnë larg, 

por që ngrohin të njëjtin shpirt.

Kam ardhur nga larg 

jo për të numëruar kilometrat, 

por për të mbledhur përqafimet 

që malli i ka ruajtur me vite.

Fëmijët e mi më presin 

me dashurinë që nuk ndryshon kurrë, 

dhe unë e gjej veten 

në buzëqeshjen e tyre të çiltër.

Nipërit e mbesat, 

këto lule të reja të jetës, 

mbushin ditët me gëzim, 

dhe sytë e mi me dritë.

I dëgjoj teksa flasin 

në gjuhë të vendeve 

ku janë rritur, 

por zemrat e tyre 

ende njohin 

gjuhën e dashurisë familjare.

Sa bekim i madh është çmallja! 

Të prekësh duart e fëmijëve, 

të ndjesh afërsinë e tyre, 

të shohësh brezin 

që vazhdon si një lumë 

që nuk shteron.

Sot Europa më duket më e vogël, 

sepse dashuria i afron të gjitha largësitë. 

Dhe kuptoj se atdheu im i vërtetë 

nuk ka kufij e as harta.

Atdheu im janë fëmijët e mi, 

nipërit e mbesat e mia, 

dhe dashuria që na bashkon 

kudo që jetojmë.

Zemra nuk banon në një vend, 

por aty ku rrahin zemrat 

e njerëzve të dashur. 

E Atdheu im janë 

Fëmijët e mi.