Zekerija IDRIZI : HALIME MUSA AJVAZI – FARMACEUTE DHE POETE ZËARBËRORE

Zekerija Idrizi

HALIME MUSA AJVAZI – FARMACEUTE DHE POETE ZËARBËRORE

Shkruar nga Zekerija Idrizi

Mirushe H.Musa

Halime Musa Ajvazi, e njohur me nofkën përkëdhelëse Mirushe, lindi më 5 maj 1970 në fshatin Dumnicë të Vushtrrisë, në një familje të njohur për vlera të larta njerëzore, shpirt atdhedashës dhe përkushtim ndaj dijes e lirisë. Qysh në fëmijëri, Halimja mbarti në shpirtin e saj një ndjeshmëri të thellë ndaj natyrës, njerëzve dhe vendlindjes – ndjeshmëri që më vonë do të derdhej në vargje të thjeshta, por të fuqishme.

   Shkollimin fillor e kreu në vendlindje, ndërsa gjimnazin e përfundoi në qytetin e Vushtrrisë. Megjithëse nuk pati mundësi të ndjekë studime universitare për shkak të kushteve të vështira ekonomike dhe realitetit politik të kohës, dashuria për letërsinë dhe artin nuk u shua asnjëherë brenda saj. Vargjet e para i shkroi që në moshë të re, duke i ruajtur si thesar në fletore modeste, por me zemër të madhe.

   Në vitin 1993, Halimja krijoi familjen e saj dhe u përball me sfida të mëdha, veçanërisht gjatë viteve të vështira të regjimit shtypës serb. Në vitin 1997, ajo dhe familja e saj emigruan drejt Gjermanisë, ku jetuan për më shumë se një dekadë pa dokumente të rregullta, duke përballuar jetën me durim, guxim dhe dashuri. Pavarësisht vështirësive, ajo dhe bashkëshorti i saj ndërtuan një jetë të re, duke rritur katër fëmijë me përkushtim dhe sakrificë.

   Në vitin 2006, kur më në fund fituan të drejtën e qëndrimit të rregullt në Gjermani, Halimja vazhdoi të punonte dhe të arsimohej. Ajo u integrua shpejt, duke ndjekur kurse të gjuhës gjermane dhe duke u angazhuar profesionalisht fillimisht në fushën e tregtisë, e më pas në sektorin farmaceutik.

   Poezia, megjithatë, kurrë nuk e la. Ajo ishte fryma që e mbante gjallë – një pasion që nuk njihte kufij. Në ditëlindjen e saj të 50-të, në vitin 2020, fëmijët i dhuruan një moment të paharrueshëm: botimin e parë të poezive të saj në një libër të veçantë, të përgatitur me dashuri në fakultetin ku ata studionin në Koblenz. Ky akt dashurie e riktheu Halimen fuqishëm në rrugën e krijimtarisë letrare.

   Një shtysë e madhe për të vijuar me poezi ishte edhe amaneti i babait të saj të ndjerë, përkrahësi i saj më i madh. Ai i kishte lënë si trashëgimi shpirtërore dëshirën që një ditë të botonte një libër me krijimet e saj. Një vit pas ndarjes së tij nga jeta, më 2 maj 2024, Halimja e përmbushi këtë amanet, duke botuar për herë të parë përmbledhjen poetike “Mirushja”, titull që mbante emrin përkëdhelës me të cilin babai e thërriste me dashuri që nga fëmijëria.

   Sot, Halimja jeton mes Gjermanisë dhe Kosovës, duke mbajtur gjallë lidhjen me rrënjët, me tokën që e lindi dhe me fjalën që e bëri të pavdekshme. Poezia e saj është një dritare ku pasqyrohen ndjeshmëria e gruas, forca e nënës, dhimbja e mërgimit dhe dashuria e pakushtëzuar për atdheun.

   Më 3 korrik 2025, emri i saj u bë pjesë e përmbledhjes poetike “Na bashkoi poezia”, botim nga Ilmi Dervishi dhe Burbuqe Agolli, që mblodhi 100 poetë nga të gjitha trevat shqiptare. Me poezinë e saj “Dasma e luftës”, Halime Musa Ajvazi sjell një himn për atdheun, sakrificën dhe jetën që lind nga dhembja.

   Halime Musa Ajvazi është dëshmi se poezia lind edhe në heshtje, rritet në sakrificë dhe lulëzon me dashuri – si një shpirt që nuk u ndal kurrë së shkruari.

  Përndryshe, në opusin e saj krijues ajo ka edhe shumë poezi të tjera, të cilat në të ardhmen pritet t’i botojë në libra të veçantë.

   Halimes i uroj shëndet, mbarësi dhe suksese të shumta në fushën e krijimtarisë letrare!