Ragip RAMAJ : Buqetë poetike

Ragip RAMAJ

 

DRITARJA E MËRGIMTARIT

anija e fundosur

n´detin e harrimit

ruan një çelës të ndryshkur

një dritare e braktisur

prej mëngjesit deri në muzg

hijes së dhomës i jep dritë

edhe diell i jep hijes së dhomës

terri i vetmisë të mos i brejë muret

ditën që ai u nis e mbylli me dorën e vet

tri herë e rrotulloi çelësin e fjalës

dhe diçka përshpëriti nëpër dhëmbë

vetëm një yll e dëgjoi

dhe fjalën e dhënë

e mbylli në guacën e hënës

që po dilte mbi zabel

ajo pret, nuk bjen, qëndron

derisa muret të bëhen dhe

ta mbulojë trupin e tij

e fjalën e dhënë

gur varri t´ia vnojë* te koka

____________________

        *Vnoj - vendos

MËRGIMTARIT

Ty të shoh gjithmonë si qiell vjeshte

n´sytë e tu e shoh lumin duke gurgullu`

n´ballin tand e shoh një zjarr kreshte

këto udhë t´botës i mas vetëm me hapat e tu.

A je ti një prush apo vetëm një urn zjarri

a je gjumë i tretur nga netët e mia,

a je shi i derdhur me shtamba malli

a je copë trishtimi shkëput nga dashnia?

E di çka shkrep´tinë n´qiellin e shpirtit tand

e di që meridianeve ti u jep zjarrmi,

kjo botë kaq e madhe për secilin ka vend

e për ty ka rezervu´ sall shekuj vetmi! 

DIELLI UA QET GJUHËN DO POETËVE

Do poetë kur shkruajnë poezi për diellin

dielli qesh me ta dhe ua qet gjuhën

lot gazi rrjedhin syve të tij.

Yjet ia fshijnë lotët me shaminë e hënës.

E kur ndodh madje t´i torturojnë metaforat

diellit i rritet tensioni i gjakut

mjeku i qiellit i shkruan shurup

një lugë kur lind në mëngjes

një lugë kur perëndon në mbrëmje.

Qielli i këshillon poetët

poezia nuk është dëshirë

dhunti është poezia

është lumë që rrjedh

përroskave të shpirtit

e jo sokaqeve të dëshirës.

Edhe lumi fundoset në klithma

i thyhen xhamat e gurgullimës

kur shkruajnë do poetë për diellin.

Kur do poetë shkruajnë për diellin

lulet struken në gjirin e pranverës

nektari t´mos u bëhet pelin

t´mos u thyhen krahët e petaleve

e t´mos helmohet mjalti i bletëve.

Kur do poetë shkruajnë poezi për diellin

qan e qan edhe qielli

i dhemb koka

furtunë e fërfëllazë mbulohet gjithë toka.